10 وعود قطعناها على نفسنا في شركة Hesham Tarek Developments
إحنا عارفين إن شراء وحدة عقارية مش قرار بسيط خالص… ده ممكن يكون واحد من أكبر وأهم القرارات اللي حضرتك هتاخدها في حياتك.
وعارفين كمان إنك ممكن تكون بتحط في الوحدة دي جزء كبير جدًا من مدخراتك، أو حصيلة شغلك وتعبك على مدار سنين.
علشان كده، من أول يوم كان لازم نبقى واضحين مع حضرتك في طريقة شغلنا ومسؤوليتنا تجاهك، ونقطع على نفسنا 10 وعود أساسية هنلتزم بيها في كل مشروع نقدمه، من قبل ما تتعاقد معانا، ولحد ما تستلم وحدتك، وحتى بعد التسليم.
1- الوضوح والشفافية :
من حقك قبل ما تشتري تبقى عارف كل حاجة عن المشروع بوضوح… الأرض ملك مين، موقف التراخيص إيه، وحدتك مكانها فين، مساحتها كام، مواصفاتها إيه، هتدفع إزاي، وهتستلم إمتى.
مش هنخبي عنك أي معلومة، ومش هنديك وعود إحنا مش قادرين ننفذها.
2- قيمة حقيقية مقابل السعر :
إحنا عايزين لما حضرتك تشتري مننا، تحس فعلًا إنك خدت قيمة حقيقية مقابل كل جنيه دفعته.
وده من خلال تصميم هندسي احترافي، واستغلال كويس جدًا لكل متر داخل الوحدة، وتنفيذ محترم، وخامات عالية الجودة تعيش معاك وتحافظ على قيمة استثمارك.
3- الالتزام بالعقد :
أي حاجة هنتفق عليها مع بعض ونكتبها في العقد، إحنا ملتزمين بتنفيذها.
لأن العقد بالنسبة لنا مش مجرد ورق بيتوقّع… ده اتفاق واضح بينا وبين حضرتك، ومسؤوليتنا إننا نحترمه ونحافظ على جميع حقوقك.
4- التسليم في الموعد :
هنحدد مع حضرتك موعد تسليم واقعي، ونلتزم بيه.
مش هنقولك موعد هدفه بس إنه يشجعك على الشراء، وبعد التعاقد نفضل نأجل. إحنا من البداية هنحط خطة تنفيذ حقيقية، ونتابع كل مرحلة فيها، علشان تستلم وحدتك في الموعد المتفق عليه.
5- الالتزام بالتراخيص :
المشروع اللي هتشتري فيه هيكون منشأ قانوني، متنفذ طبقًا للتراخيص والاشتراطات الإنشائية والمعمارية المعتمدة.
مش هنعمل مخالفات ممكن بعد كده تهدد سلامة المبنى، أو تسبب مشاكل لحضرتك أو لباقي الملاك.
6- ثبات السعر :
السعر اللي هنتفق عليه ونكتبه في العقد هو السعر النهائي اللي حضرتك هتدفعه.
مش منطقي إنك تشتري مننا النهارده، وبعد سنة أو سنتين نقولك الحديد غلي أو مواد البناء زادت، فمحتاجين منك فرق سعر.
توقّع الزيادات وحسابها من البداية مسؤوليتنا إحنا كمطور، مش مسؤوليتك إنت كعميل. ومن حقك إن سعر وحدتك يفضل ثابت، وتستفيد إنت من زيادة قيمتها مع الوقت.
7- إحنا بنتملّك الأرض قبل ما نطرح المشروع :
مفيش أي مشروع عندنا هيتم طرحه للبيع قبل ما نكون اتملّكنا أرضه بالكامل بشكل قانوني.
إحنا مش هنستنى نجمع فلوس من العملاء علشان نشتري أرض المشروع. إحنا الأول بنشتري الأرض بأموال الشركة ونتملّكها بالكامل، وبعد كده نبدأ نطرح المشروع ووحداته للبيع.
8- فلوس مشروعك هتفضل في مشروعك :
الأموال اللي هندخلها من مشروعك هتتخصص لأعمال المشروع وتنفيذه.
مش هناخد فلوس مشروعك ونستخدمها علشان نشتري أرض جديدة، أو نمول وننفذ بيها مشروع تاني. كل مشروع عندنا ليه خطته وموارده، وفلوسه بتفضل مخصصة ليه لحد ما يكتمل ويتسلّم.
9- مسؤوليتنا مش هتنتهي عند التسليم :
إحنا مش هنسلّم حضرتك الوحدة ونجري، ولا علاقتنا بيك هتنتهي بمجرد ما تستلم المفتاح.
مسؤوليتنا عن المشروع مستمرة بعد التسليم، من خلال متابعة أعمال الصيانة والأمن والعناية بالمبنى والأجزاء المشتركة؛ علشان نحافظ على جودة المكان، وعلى قيمة وحدتك واستثمارك على المدى الطويل.
10- هتفضل متابع مشروعك وتتواصل معانا بسهولة :
من حقك طول فترة التنفيذ تبقى عارف مشروعك وصل لفين، وإيه اللي اتنفذ فيه فعلًا.
علشان كده، هنشارك معاك تطورات المشروع بصورة دورية من خلال تقارير وصور وفيديوهات حقيقية من موقع التنفيذ.
وكمان هنوفرلك قنوات تواصل واضحة ومباشرة تقدر من خلالها تسأل وتتابع طلباتك، من وقت التعاقد، وطول فترة التنفيذ، وحتى بعد ما تستلم وحدتك.
دي طريقة الشغل اللي اخترنا نبني بيها Hesham Tarek Developments، ومسؤولية قطعناها على نفسنا قدام كل عميل هيثق في اسمنا ويحط جزءًا من مدخراته في مشروع من مشروعاتنا.
وإن شاء الله، هنفضل على قد الثقة دي في كل خطوة… وفي كل مشروع نقدمه.